فيه حاجة ف قلبى ليكى

فيه حاجة ف قلبى ليكى نفسى أحكيلك عليها
لكن قدام عينيكى بانسى الدنيا وما فيها
ويتوه منى الكلام ... حتى كمان السلام
واحلم واسرح قوام ... أول ما ألمس ايديكى
نفسى اقوللك ع اللى بيه وتسمعينى ... والقى قلبك حس بيه وبينادينى
ولا اقوللك انى شايف ... احلى عين واجمل شفايف
ولا اقوللك يوم بحبك ... بس ليه انا منها خايف
ببقى ناوى خلاص اقوللك ع اللى بيه وع اللى جانى ... والقى نفسى ف حضن ظلك فجأة يتلجم لسانى
واسرح فى رموش عيونك ... وجمال شعرك ولونك
والضحكة والإبتسامة ... واقول الله يصونك

طاوع قلبك

طاوع قلبك ... متخليش خوفك وكسوفك يكسر حبك
طاوع قلبك ... وانا عن نفسى هاقرب منك وافضل جنبك
بس أمانة عليك شجعنى ... واما اندهلك ابقى اسمعنى
ولا اندهلى طب ايه يعنى ... قبل ما ييجى الوقت واعاتبك
***
طاوع قلبك وامشى طريقك ... خدنى حبيبك خدنى صديقك ... سلم قلبك ليا وعيش
وانت تلاقى معايا وجودك ... تبقى حدودى وابقى حدودك والأحزان تبعد متجيش
***
طاوع قلبك مهما يقوللك ... قلبك برضه اكيد هيدلك ... ان الجنة ف قربك منى
وانا عن نفسى بواعد قلبك ... هافضل طول العمر بحبك ... مش راح اسيبك تبعد عنى

زى النهاردة

زى النهاردة اتولد لى قلبك
زى النهاردة إبتدالى عمر جديد
كنت انا قبل اما اشوفك بحبك ... كنت انا اكتر واحد فى الكون سعيد
كل سنة وانتى زى مانتى ... جميلة ورقيقة ومعايا هواكى
كل سنة واحنا مع بعضنا ... وبحبك وبقربك وباسمع نداكى
كل سنة وانتى يا حبيبتى طيبة

إحساسى بيكى

إحساسى بيكى ... إحساس غريب وجديد عليَه
قدام عينيكى ... حاجات كتير بالاقيها فيَه
ويحس قلبى بهمس قلبك ... وينادى ويقوللك بحبك
واتمنى اقضى حياتى جنبك ... والعمر كله أعيشه ليكى

إحساس بيكى ... ده أحلى حاجة فى دنيتى
ياللى ف عينيكى ... باشوف طريقى وسكتى
ياللى انتى اجمل من ملاك ... لو حتى كان حبك هلاك
هافضل اعيشلك وانتهى ... كل اللى قبلك بين عينيكى