أتملـــَــى منــــــك

أتملى منك قبل لما تودعينى

أشوف عيونك وبجمالك أملى عينى

قبل ما يجنى الزمن على حبنا

قبل ما يكسر براءة قلبنا

قبل لما خدودنا تحضن دمعنا

حطى ايدك فوق جبينى ... واتملى منك قبل لما تودعينى

سيبى ايدك بين ايديه واسمحيلى احضن ايديكى

حطى عينك دى ف عينيه وقولى آخر كلمة ليكى

قولى ان فراقنا كان مكتوبلنا

وانه عايش جوة منك حبنا

وانه كان حكم الزمن نبعد فى يوم عن بعضنا

شوفتـــــى النصيـــب

بعد كل الماضى واللى حصل فى حياتى

كنت قربت اقول انا مش هاحب تانى

وبدأت فعلاً اشغل فى يومى اوقاتى

لكن ادينى عشانك باغير كل ده تانى

شوفتى النصيب ... اهى جت معاكى

شوفتى النصيب ... وبقينا لبعض

شوفتى النصيب ... اهى جت فيكى انتى

ولا عمر ما هيفرقنا بعد

واهو كل شيئ قسمة ونصيب ... ودى حقيقة مهما اختلفنا

ونصيبى تبقى انتى الحبيب ... فاكرة زمان كان ايه هدفنا

واقوللك ايه غريب فوق كل ده

انا حاسس انى مكنش لازم احب غيرك

مع انك كنتى معايا من قد كده

ولا عمرى فى يوم فكرت انى ابقى حبيبك

وكمان معاكى نسيت الماضى ... نسيته ازاى انا معرفشى

وكأن قلبى طول عمره فاضى ... ومعاكى الجاى ومبسألشى

كلــــه بيكــــــدب

كله زى بعضه وكله بيكدب

حتى اللى تحيله همك وتشكيله

قلبه هيقسى عليك قلبه هيكدب

حتى اللى عشت معاه واللى ابتديت وياه

لو كان حنانك ايه برضه هيكدب

طب ليه ... نعيش أيام مليانه كلها كدب

ده ساعات ... من كتر كدبنا ده بنصدق ان ده حب

ونعيش أيام ... وندوب فى غرام

ونسيب أحلام ... علشان شوية كدب

وانا مبقولكش متحبش ... لأ عيش فى الغرام قد ما تقدر

انا بس عايزك اوعى تصدق ... انه يوم هيدوم ده كله متقدر

يمكن احساسك صادق وتلاقى حب

يمكن اكون انا كمان كلامى ده كله كدب

ملنــاش دنيـــا تـانيـــة

والله ما تسوى ... نحزن ولا ثانية

اهى دنيا عايشين فيها ... ملناش دنيا تانية

عيش حياتك وعيش وقتها ... قد ما تديك حبها

وانت حاسس انك قدها ... عمرها ما تأثر فيك

طب هنحزن ليه

قوللى لو تحزن فى يوم هترجع اللى راح

كلنا عايش موهوم يبكى من جراح

نسينـــــى يـــــا رب

نسينى يا رب الدنيا علشان أقدر انساها

نسيها يا رب حكايتى ... كلامى ملامح صورتى

زى ما نسيتنى فى ثانية ... متسبليش ذكرى معاها

خلينا يا رب نعيش ... من غير ما تجمَع بيننا

نتقابل زى مفيش ... كان ايه يعنى اللى ما بيننا

متسكنهاش جوايا ومتسجنيش فى حكاية ... وحلم اتمنيته معاها

موَت جوايا مشاعرى ... وادينى فى يوم احساس

اديته بطيبة خاطر ... بإيديَه لأقسى الناس

متألمنيش بجراح ومتولدليش افراح ... غير لما تموت جواها

جزائـــى واللى يحصلــــَــى

مين قاللك معنديش قلب ... مين قاللك إنى كويس

ليه احساسى يطلع كدب ... واحسك مش عارفنى كويس

انا بانهار ومش عارف اعيش ازاى ... وانا ظالم حد كان بيحبنى وعمره فى يوم ما زعلنى

انا لو هاحكى واقول باتعذب ... مش لازم اوصلك احساسى ده ادينى وخلاص مستنى

جزائى واللى يحصلى

ومتفكرش مين غلطان ... ولا مين الضحية

كفاية انى هاعيش ندمان ... م الإحساس بالأذية

محدش فينا بيستحمل يكون بايت ... وهو حزين انا وانتى هوانا ضاع وايه كان لينا يوم يعنى

وعمرى فى يوم ما هتألم ولا هابكى ... بدمع العين على احلام هاعيش وهاموت وادينى وخلاص مستنى

جزائى واللى يحصلى

كــــل الكــــلام

هاقول انى بحبك وهاقوللك وحشتينى

وهاقوللك انى باموت فيكى وهاقوللك ... كل الكلام

لكن يا حبيبتى ولا نص كلمة هتوصفلك

اللى جوايا وحاسس بيه دى حاجة اكبر من ... كل الكلام

علشان كلام الناس كله ... اللى قالوه واللى لسه

مبقاش يكفى حيى فيكى ... اللى بيزيد فى كل همسة

وبرضه علشان خاطرك

يا حبيبتى اصل كلام الدنيا ... هيوصف ايه من جمالك

ده اكتر حد جميل شفته ... وحش قوى بالنسبة لك

ومع ذلك .. متزعليش

حسستنـــــــــــى

حسستنى انك بتحبنى ... واما قربت منك نسيت كل الكلام

ليه بتعاند قلبىوليه بتشاغل حبى ... واما باقرب بتسيب كل الغرام

على حبك بانلى دليل ... ماتحن بقة وتميل

ده الحب مش ملاوعة ... ولا انت رأيك ايه يا جميل

ما بلاش التقل شوية ... محتاج منك حنية

كمل قصة هوانا ... وانا مستعد اهديك عينية

وانا عارف انك جاى ... ومتسألنيش ازاى

احساسى هو اللى قاللى ... وفتنلى قلبك انك جاى

ده انا اكتر واحد حبك ... وانا اكتر واحد جنبك

ده انا قلبى بيروح منى ... لوثانية عدت وانا مش جنبك

خليك باصص لفوق ... كتر فى قلبى الشوق

بس انت لما تغرق ... مش راح تلاقى اى طوق

انا عايزك تبقى معايا ... وتكون دايماً جوايا

وانا باوعدك من قلبى ... حتلاقى كل الغرام ويايا

لســــه فاكـــــــــر

لسه فاكر من ساعتها اللى حصل

لسه حاسس زى ما يكون لسه حاصل

شوق وعدى من خلال قلبك وصل

عند قلبى وقلبى عندك لسه واصل

حب ايه ... مبحبكيش ... هو فيه حب كده؟

اكتر من الحب ... اكتر من العشق ... اكتر كتير من ده وده

طعم كل حاجة حلوة دقته جنبك

لما جيتى قولتى بحبك اول مرة

وانتى عارفة امتى انا حسيت كأنى

كل العالم جوة منى وهو برة

إحلـــــــــــــــــــــم

إحلم ... حلمك هو اللى هيفضلك

إحلم ... إوعى تسيب الدنيا تذلك

إحلم ... لو بالقمر انه هينزلك

عيش للدنيا وللأيام... إملى حياتك شوق وغرام

مين فى الدنيا دى عاش فى سلام ...مين من غدر زمانه بيسلم

إحلم بالأيام الجاية مده الدنيا إيديها ببسمة

لسه القلب مشفش قسية لسه صغير زى النسمة

لسه مآنش اوان احزانك ... لسه فى زمن الحلم مكانك

عيش بالحب وعيش بالفرحة ... ضم الدنيا ما بين أحضانك

إرمى زمان الحزن فى ظهرك واوعى تفكر فى اللى باعوك

انسى جراحك, دمعك, سهرك يمكن هما كمان ينسوك

إحلم تلقى حبيب وياك ... ولا بيبيعك ولا ينساك

إحلم تلقى الدنيا جميلة ... تلقى الفرحة بتستناك

توافقـــى عليـــــــه

ايه اللى فيه ومش فيَه يخليكى توافقى عليه؟

ايه اللى عندهومش عندى يخليكى تحلمى بيه؟

ايه اللى عمله عشانك ومعملتوش؟

ليه ياخد هو مكان مأخدتهوش؟

ليه هو يكسب حبك اللى مكسبتوش؟

هو استحمل عشانك كل الآلام؟

هو تعب وشال فى ايديكى الأحلام؟

هو اللى صبَر نفسه على قسوة الأيام؟

سؤال مش لاقى جواب عليه ... رضيتى بحبه ليه ... وفضلتيه عليَه

أكتــــــر حــــد

رقة طفل صغير وقلب مفيش حنيته

وعشانك أتغير لو قلبى هيطول جنته

كل كلام الدنيا ... مش ممكن يوصفك

لازم اللى يحبك ... يبقى زيك ويعرفك

إنتى أكتر حد فى الدنيا هاندم عليه

وانتى أكتر حد عارف باقول كده ليه

وانتى أكتر حد نفسى ألمس ايديه

مشاعرنا بتتغير وانتى مشاعرك فيها ايه

باحلم بيكى وافكر وانا عارف نهايتى ايه

بامنع نفسى انى احبك ... وباحب انا غيرك

وادعى انى مكنش فى يوم ... عديت فى تفكيرك

على بالــــى

حلم وكان على بالى ... اتحققلى وجالى

يوم ما قابلت عينيكى وحسيتى باللى بيجرالى

كنت بافكر فيكى ... قبل ما اشوف عينيكى

واتأكدت بنظرة عينك وبلمسة ايديكى

آه لو كان الحب كلام .... انا كنت اقول كل كلام الحب ده ليكى

آه لو كان الحب أحلام .... على طول حافضل عايش عمرى باحلم بيكى

قلبى عشانك غنى ... وياما كتير استنى

لما تحنى عليَه فى يوم بالحنية والجنة

حب ده ولا جنون ... ولا ده وهم ظنون

ردى عليَه وقولى الحب ده عمره فى يوم ما يهون

أنا مستنيــــكى

فى يوم الحب

كلهم بيحبوا بعض ... كلهم بينسوا البعد

كلهم بيتمنوا أكتر ... الخير والحب لبعض

فى عيد الحب

كل حاجة بتبقى أحلى ... كل دقة قلب أعلى

والحبايب يبقوا أكتر ... عند بعض أغلى وأغلى

وانا مستنيكى ياللى طول عمرى

وانا باحلم بيكى تملكى أمرى

وأعيش حوليكى بس إمتى هتيجى وهالاقيكى

ده انا شايل ليكى كل حب الدنيا

وحاسس بيكى إحساس بيكبر كل ثانية

وبنده عليكى نفسى يوم الاقيكى بس انتى فين

انا باعيش

عالأمل انك جاية ... جايبة معاكى الحنية

وعمرى فى يوم انا ما اتعب ... لو حتى طال الشوق بيه

انا عارف

نصيبى اكيد جاى ف يوم ... هيشيل عنى كل الهموم

ومستنيه ييجى براحته ... اللى يكون ليَه مقسوم

إسمعيــــــــنى

إسمعينى لما أقوللك يا حبيبتى كونى ليَه

إسمعينى راح اغير كل حاجة وحشة فيَه

إسمعينى وإفهمى إن إنتى خسرانة معاه

وإنى شايفك سايبة نفسك تتوجعى وياه

ليه مش قادرة تفكرى ليه خايفة تقررى

ليه يا حبيبتى مش قادرة من حبه تتحررى

طب سيبيلى فرصة واحدة أغيرك آه لو قدرت فى مرة إنى أخيرك

تبقى ليه ولا ليَه

نفسى مرة تقولى مالك ياللى دايب فى جمالك

ليه مش حاسة ان حبك ذكرى وماضى وهالك

لو عليَه هاعمل اللى بيعمله وأى طريق بينك وبينه هاكمله

وانا قد الدنيا ديَه

خلاص حنيت

خلاص حنيت ... وافتكرت انا قد ايه كنت حبيبك

وجيت دقيت ... بابى عليَه وبتقوللى انسى انى اسيبك

يعنى رجعنا عايزنى اعيش جنبك ايامك

ولا هترجع بعد يومين تنسى كلامك

والله شكلك كده عايش لسه ف اوهامك

طب انا لو رجعت اعيش معاك ... اطمن ازاى لقلبك

مانا كنت مرمى فى حضن هواك ... فجأة لقيت انى انا سبتك

قلبى مشتاقلك

عدت ليالى كتير وقلبى مشتاقلك جوايا شوق وحنين دايماً بيندهلك

ويوم لؤاك دايماً قلبى بيسبقلك ياللى رغم البعد عنك روحى بتبعتلك

الحب والشوق والآهات تفكرك باللى ياما فات

يمكن تحن لذكريات عشتها فى يوم معايا

وقلبى لسه بيندهلك

يا حبيبى

عدت ليالى كتير وانا وقلبى الكبير لسه فى حبك بنلعب دور كبير هو الأسير

يا واحشنى

لو مرة أقدر فى غيرك ليوم أفكر مكنتش احتاج لكل اللى باحاول بيه أعبر

ياللى عمرك

ما حسيت بيَه ولا مرة يا قاسى كل ماشكيلك همومى دايماً تحاول تعمل ناسى

لكنى عارف

ان حبك مهما لف عندى راسى مش راح تلاقى حد تانى تزعله تلاقيه يبعتلك